E mbijetuara e dhunës seksuale gjatë luftës së fundit në Kosovë, Vasfije Krasniqi-Goodman ka folur sot para Kuvendit të Kosovës.
Në ditën e të mbijetuarve të kësaj dhune, ajo ka thënë se qëndron sot përpara tyre si një zë që nuk zgjodhi kurrë heshtjen.
“14 prilli nuk është vetëm një datë për mua, por është një datë që ndryshoi jetën time përgjithmonë dhe pikërisht me 14 prill ky Kuvend bëhet një vend i veçantë i kujtesës, ku heshtja nuk thehet por ndriqon. Është një kujtesë, një thirrje dhe një shpresë”, ka thënë ajo.
Ajo ka thënë se qirinjtë që kanë ndezur sot, përfaqsojnë forcën e tyre për të vazhduar përpara.
“Në këtë sallë drita ka një kuptim tjetër, është prani, respekt, është kujtim që nuk shuhet. Për shumë vite, drita ka munguar në jetën e shumë të mbijetuarve, Heshtja, stigma dhe mungesa e mbështetjes familjare e shoqërisë ka bërë që shumë histori të mbeten të heshtura. Sot përmes këtij akti kolektiv, ky Kuvend bëhet një hapësirë ku heshtja thyen dhe zëri ndriqon. Çdo qiri që ndezëm sot është mesazh i qartë që të mbijetuarat nuk janë vetëm, zëri jonë ka rëndësi dhe dinjiteti duhet të mbrohet e respektohet”, ka thënë ajo. /Lajmi.net/
