Forcat Izraelite të Mbrojtjes (IDF) njoftuan se kanë identifikuar raketa të tjera të lëshuara nga Irani drejt vendit.
Sistemet mbrojtëse janë aktivizuar për t’i kapur, ndërsa një paralajmërim është dërguar në telefonat e banorëve në zonat e prekura.
Ata që morën alarmin janë udhëzuar të qëndrojnë në hapësira të mbrojtura deri në njoftime të mëtejshme.
Siç raporton BBC, pamje të reja tregojnë shkatërrime në Teheran pas gjashtë ditësh sulmesh amerikano-izraelite, ku shpërthime janë vërejtur në kryeqytetin iranian gjatë mëngjesit.
Ndërkohë, ushtria izraelite raportoi sulme të reja nga Irani, pasi shpërthime u panë më parë në qiell.
Emiratet e Bashkuara Arabe thanë se sot kanë kapur gjashtë raketa iraniane dhe 131 dronë, por një raketë dhe gjashtë dronë ranë brenda vendit. Ambasada britanike në UAE më parë kishte paralajmëruar njerëzit të qëndronin në hapësira të sigurta.
Në rajon, shpërthime u raportuan gjithashtu në Katar dhe Bahrein; Azerbajxhani tha se është sulmuar nga dy dronë iranianë; ndërsa një tanker u dëmtua në Gjirin Verior – Irani deklaroi se goditi një anije amerikane.
Ndërkohë, fluturimi i parë i organizuar nga qeveria britanike për të rikthyer qytetarët nga rajoni u vonua për shkak të një problemi teknik. Fluturimi nga Omani ishte planifikuar të nisej mbrëmë, por do të fillojë sot.
Në pjesën veriore të Irakut, iranianët kurdë mohojnë se forcat e tyre kanë hyrë në Iran, “Nuk mund të lëvizim nëse qielli mbi ne nuk pastrohet,” thanë ata për BBC-në.
