Një urdhër evakuimi që Izraeli ka lëshuar për një zonë të Bejrutit në Liban është “i parealizueshëm” sepse zona përmban dy spitale të mëdha, thotë drejtori i përgjithshëm i Organizatës Botërore të Shëndetësisë (OBSH).
Një urdhër evakuimi për zonën Jnah të Bejrutit “përfshin dy spitale të mëdha referimi; Spitalin Universitar Rafik Hairiri dhe Spitalin Al Zahraa”, thotë Tedros Adhanom Ghebreyesus, ka raportuar BBC, transmeton Gazeta Express.
Ka afërsisht 450 pacientë në dy spitale, 40 prej të cilëve janë në kujdes intensiv, thotë ai.
“Në këtë kohë, nuk ka objekte mjekësore alternative” për të pritur këta pacientë, thotë ai, kjo e bën evakuimin e tyre “operacionalisht të parealizueshëm”.
“Të dy objektet po funksionojnë me kapacitet të plotë, përfshirë trajtimin e të plagosurve nga sulmet e 8 prillit”, shton ai.
