Tronditet Gjilani – pesë të vrarë brenda tri javësh
Gjilani është përballur me disa ngjarje të rënda gjatë javëve të fundit, ku kanë humbur jetën pesë persona në rrethana tragjike.
Më 9 tetor, në fshatin Livoç i Poshtëm, u vranë një grua 27-vjeçare dhe vëllai i saj 31-vjeçar. Në të njëjtin rast u plagos rëndë edhe një familjar 48-vjeçar.
Prokuroria njoftoi se i dyshuari ishte 38-vjeçar dhe se motivi i rastit ende nuk dihej.
Më 11 tetor, një tjetër ngjarje tragjike u regjistrua në fshatin Pogragjë të Gjilanit, ku një 29-vjeçar humbi jetën si pasojë e të shtënave me armë zjarri.
I dyshuari, babai i të ndjerit, ishte larguar nga vendi i ngjarjes, ndërsa Policia kishte nisur kërkimet për lokalizimin e tij.
Ndërkaq, sonte, më 1 nëntor, një tjetër tragjedi u raportua në fshatin Demiraj, ku u gjetën pa shenja jete një 27-vjeçar dhe një foshnjë.
Lexo edheVrasja e dyfishtë në Gjilan, Gërvalla: Rrethanat e rastit të hetohen plotësisht dhe pa vonesa, institucionet të marrin veprimet që kërkon ligji
Policia ka arrestuar një 65-vjeçar, babanë e viktimës së rritur, ndërsa rasti është cilësuar si „Vrasje e rëndë“.
Sipas organeve të rendit, hetimet për zbardhjen e plotë të rrethanave po vazhdojnë.
Ndryshe, kryetari i Komunës së Gjilanit, Alban Hyseni, ka reaguar pas tragjedisë së rëndë në fshatin Demiraj ku humbën jetën dy persona.
“Sot komuna jonë u trondit nga lajmi i rëndë për humbjen e dy jetëve në fshatin Demiraj. Në këto momente të vështira, ndajmë dhimbjen me familjarët”, shkroi ai në Facebook.
