Presidenti Hashim Thaçi sot i është adresuar Qeverisë së Kosovës në prag të dhjetëvjetorit të Pavarësisë. Pas disa konferencave që i pari i vendit ka mbajtur së fundmi, ai ka numëruar sfidat nëpër të cilat ka kaluar vendi në këtë periudhë edhe para Qeverisë dhe kryeministrit Ramush Haradinaj
Sipas Presidentit Hashim Thaçi, trendet e zhvillimit janë pozitive ndonëse shtetndërtimi nuk ka qenë i lehtë.
“Vetëm para 10 viteve veriu ishte në dorë të strukturave ilegale, tash situata është ndryshe. Kemi mbajtur zgjedhje, kemi instaluar policinë atje”.
Presidenti Thaçi ka kërkuar që të plotësohen kushtet e BE-së nga të gjithë. Ai shtoi se janë të mirëseardhura përpjekjet për të gjetur zgjidhje për demarkacionin.
“Përmbushja e të gjitha kushteve për vizat, krijimi i ushtrisë si dhe ruajtja e miqësisë me ndërkombëtarët janë synimet tona. Janë të mirëseardhura përpjekjet për të gjetur zgjidhje për demarkacionin”.
Thaçi tha se Kosova ka hyrë në fazën e fundit të dialogut me Serbinë dhe vendi është shembull për marrëdhënie të mirë me fqinjë.
Për Gjykatën Speciale, ai tha se Kosova do të përmbushë detyrat e saj në mënyrë që të mos rrezikojë partneritetin me aleatët e saj.
“Edhe sa i përket Gjykatës Speciale, ani pse pa të drejtë historikisht, Kosova ka marrë obligimet e veta dhe do t’i kryejë në përpikëri me marrëveshjet që kemi arritur. Ky vendim është bërë për të ruajtur partneritetin strategjik me ndërkombëtarët”, ka thënë Thaçi.
