Ndonëse u nda lokacioni dhe gjithçka ishte gati për të filluar punimet, Parku i Biznesit nuk “lulëzoi” asnjëherë në Skënderaj.
Opozita thotë se dështimi ka të bëjë kryekëput me interesat personale të zyrtarëve
komunalë karshi firmave të huaja që kanë dashur të investojnë në vend, duke u kërkuar favore e mitmarrje, raporton KTV.
Isa Fejzullahu nga LDK-ja thotë se ky nuk është dështimi i parë i PDK-së me investitorët, duke bërë kështu që shumë kompani t’i ndalojnë investimet këtu.
Hajriz Koci, zëdhënës i Komunës së Skënderajt i quan të pavërteta këto akuza dhe shton se komuna ka krijuar kushte jashtëzakonisht të mira për investitorët.
Koci nuk deshi të tregojë se sa ka kushtuar realizimi i mundshëm i këtij parku që nuk u bë kurrë.
Por opozita ka thënë se ai kapte shumën prej 4 milionë eurosh.
Komuna kishte nënshkruar edhe kontratë me kompaninë sllovene Tehnopolis, për ndërtimin e parkut, por më pas e kishte shkëputur atë.
KTV-ja ka tentuar të kontaktojë zyrtarët e kësaj kompanie sllovene, por numrat e publikuar të kompanisë nëpër webfaqe, nuk kanë qenë të vërtetë.
