Kryetari i sapo zgjedhur i Londrës, myslimani Sadiq Khan, ka thënë se ai nuk e pranon ofertën e kandidatit republikan për President të ShBA-së, Donald Trump, që të bëjë një përjashtim në ndalimin e myslimaneve që të udhëtojnë për në ShBA dhe ta lejojë Khanin ta vizitojë ShBA-në.
Khan ka thënë: “Kjo s’ka të bëjë vetëm me mua. Por, ka të bëjë më miqtë e mi, familjen time dhe të gjithë ata që kanë prejardhje si timen, nga çdo vend i botës,” transmeton Gazeta Express.
Khan po ashtu paralajmëroi se mendimet prej një “injoranti” që i Trump i ka për Islamin mund t’i bëjë të dy vendet e tyre më pak të sigurta.
Por, Trump kishte thënë se është i lumtur që Khan do ta udhëheqë Londrën
Trump shtoi: “Nëse ai [Khan] e bën punën mirë, dhe sinqerisht nëse e bën punën shumë mirë, do të kishte qenë një gjë e tepër e mirë.”
Khan ka thënë për BBC se e përkrah Hillary Clinton, e cila është duke konkurruar për nominim për President nga radhët e demokratëve, në mënyrë që të zgjidhet në Shtëpinë e Bardhë, duke shtuar: “Shpresoj që ajo do ta zhdëpë atë [Trumpin]”./Gazeta Express/
