Numri i qytetarëve që përfitojnë nga skema e pensioneve bazike të moshës në Kosovë ka shënuar rritje prej 7 për qind brenda një viti, sipas të dhënave më të fundit nga Agjencia e Statistikave të Kosovës (ASK).
Në muajin gusht të vitit 2024, 151,387 persona përfitonin nga kjo skemë, ndërsa në gusht të vitit 2025 kjo shifër ka arritur në 162,026 përfitues, transmeton lajmi.net.
Skema e pensionit bazik të moshës është një ndër format kryesore të mbështetjes sociale për qytetarët e Kosovës që kanë mbushur moshën 65 vjeç dhe nuk përfitojnë nga ndonjë skemë tjetër kontributpaguese. Ajo financohet nga buxheti i shtetit dhe përfshin të gjithë personat që plotësojnë kushtet ligjore për përfitim.
Rritja prej mbi 10 mijë përfituesish brenda një viti është tregues i plakjes graduale të popullsisë, por gjithashtu edhe i përmirësimeve në administrimin e skemave sociale dhe regjistrimit të qytetarëve që më herët mund të mos kenë qenë pjesë e sistemit.
Kjo rritje gjithashtu pritet të ketë ndikim të drejtpërdrejtë në buxhetin e shtetit, duke pasur parasysh shpenzimet që lidhen me pensionet bazike të moshës – një kategori që vazhdon të mbetet ndër më të mëdhatë në sistemin e mbrojtjes sociale në Kosovë./lajmi.net/
