Ambasadori i Gjermanisë në Kosovë, Jörn Rohde, ka reaguar pas dështimit të radhës për konstituimin e Kuvendit të Kosovës, duke e cilësuar vendimin e djeshëm të Gjykatës Kushtetuese si një sinjal të fortë për krizën politike në vend.
“Klasa politike po e zhgënjen popullin e vet dhe është shumë shqetësuese. Vendimi i djeshëm i gjykatës ishte, nëse flasim me gjuhën e futbollit, mund të themi si një karton i kuq, sepse po e pezullon Parlamentin që të marrë vendime,” deklaroi Rohde, transmeton lajmi.net
“Klasa politike po e zhgënjen popullin e vet dhe është shumë shqetësuese. Vendimi i djeshëm i gjykatës ishte, nëse flasim me gjuhën e futbollit, mund të themi si një karton i kuq, sepse po e pezullon Parlamentin që të marrë vendime,” deklaroi Rohde, transmeton lajmi.net
Deklarata e tij vjen në ditën kur Kuvendi i Kosovës dështoi për herë të 52-të të konstituohet, përkundër afateve të përcaktuara nga Gjykata Kushtetuese.
Më 24 korrik 2025, Kushtetuesja publikoi një masë të përkohshme, duke ndaluar të gjitha veprimet dhe vendimet e deputetëve të zgjedhur lidhur me seancën konstituive, nga 27 korriku deri më 8 gusht.
Ky vendim u mor pas kërkesave të dorëzuara nga PDK dhe LDK, të cilat kontestuan kushtetutshmërinë e votimit për formimin e Komisionit për votim të fshehtë në seancën e 29 qershorit.
Ndërkohë, vazhdimi i 51-të i seancës konstituive, më 23 korrik, u ndërpre nga kryesuesi Avni Dehari pa hedhur në votim formimin e komisionit, duke vendosur që 25 korriku të jetë data e vazhdimit të radhës – që gjithashtu dështoi.
Gjykata Kushtetuese përmes një aktgjykimi më 26 qershor, kishte detyruar deputetët që ta përmbyllin procesin e konstituimit të Kuvendit brenda afatit 30-ditor, përkatësisht deri më 26 korrik 2025./lajmi.net
