Këngëtarja dhe aktorja me prejardhje shqiptare Rita Ora i është bashkuar kastit të filmit të ri të Amazon MGM Studios, “Honeymoon With Harry”, ku do të luajë përkrah emrave të njohur si Kevin Costner, Jake Gyllenhaal dhe Sarah Pidgeon.
Ende nuk janë bërë publike detaje mbi rolin që do të interpretojë Ora në këtë projekt. Ky bashkëpunim shënon rikthimin e saj me Amazon, pas pjesëmarrjes në filmin “Voltron”, ku ajo luan përkrah Henry Cavill dhe Sterling K. Brown.
Filmi “Honeymoon With Harry”, i bazuar në librin e Bart Baker, ndjek historinë e një burri me karakter të vështirë (Gyllenhaal), i cili detyrohet të kalojë një udhëtim të padëshiruar me babanë mbrojtës të të fejuarës së tij (Costner), pasi planet e tyre ndryshojnë papritur. Ngjarja zhvillohet në sfondin e një muaji mjalti në një ishull, ku përplasjet mes dy burrave gradualisht shndërrohen në një lidhje të papritur.
Regjia e filmit i është besuar Glenn Ficarra dhe John Requa, ndërsa skenari është shkruar nga Dan Fogelman.
Ky rol i ri vjen në një periudhë të suksesshme për Rita Orën, e cila vazhdon të zgjerojë aktivitetin e saj në industrinë e filmit, krahas karrierës muzikore. Ajo pritet të shfaqet edhe në projektin e ri të Disney, “Descendants: Wicked Wonderland”, ku rikthen rolin e Mbretëreshës së Zemrave. /kultplus
