Reshjet e dendura të shiut, të shoqëruara me stuhi ere, kanë shkaktuar përmbytje në qytetin e Lushnjës, duke bllokuar disa prej akseve kryesore rrugore.
Në qendër të qytetit, aksi pranë postës qendrore, kryqëzimi i gjimnazit “18 Tetori” dhe kryqëzimi i spitalit janë mbuluar nga uji, i cili ka dalë mbi trotuare, duke e bërë të vështirë qarkullimin e automjeteve. Probleme janë shënuar gjithashtu edhe në aksin kombëtar Lushnjë-Fier, Lushnjë-Rrogozhinë dhe Pluk-Savër, ku prania e ujit në segmente të veçanta paraqet rrezik për drejtuesit e mjeteve.
Edhe qyteti i Fierit është përfshirë nga reshje të dendura vetëm pak minuta më parë. Automjetet po lëvizin me shpejtësi të ulët dhe shoferët janë të kujdesshëm në timon për shkak të kushteve të vështira atmosferike.
Ndërkohë, ndërmarrja e shërbimeve publike në Lushnjë ka qenë në gatishmëri për pastrimin e kanaleve dhe grumbulluesve të ujit, me qëllim shmangien e përmbytjeve më të mëdha.
Sipas shërbimit meteorologjik, moti i keq ishte i parashikuar për mesditën e sotme, duke sjellë reshje intensive shiu dhe erëra të forta në disa zona të vendit.
