Urimin për zgjedhjen e Donald Trump në krye të Shtëpisë së Bardhë, Kryeministri Edi Rama e nis me nota keqardhjeje për humbjen e “mikes së madhe të Shqipërisë dhe shqiptarëve”, Hillary Clinton.
“Populli amerikan bëri sot zgjedhjen e tij. Një mike e madhe e Shqipërisë, Kosovës dhe gjithë shqiptarëve, Hillary Clinton nuk i’a doli dot të behet Presidentja e parë grua në historinë e Shteteve të Bashkuara. Kundërshtari i saj, Donald Trump, u zgjodh Presidenti i dyzetepestë i SHBA, duke e bindur Sovranin të votojë alternativën e tij pas një debati të pazakonshëm brenda e jashtë Shteteve të Bashkuara të Amerikës”, shkruan Rama.
Kryeministri shprehet i bindur se marrëdhëniet mes Shqipërisë dhe Shteteve të Bashkuara jo vetëm që nuk cënohen, por do të forcohen edhe më tej.
“Duke i uruar Presidentit Trump fitoren dhe të gjithë suksesin që amerikanët dhe miqtë e partnerët e SHBA i urojnë atij vendi të madh, kam bindjen se marrëdhënia jonë strategjike me Shtetet e Bashkuara do të vijojë të forcohet në funksion të vlerave e të interesave të përbashkëta, të cilat e bëjnë Shqipërinë një mik e aleat të çmuar të popullit e të Qeverisë amerikane”, përfundon shkrimin e tij në rrjetet sociale, Kryeministri Rama.
