Kryetari i Prishtinës Përparim Rama tha se projekti i Unazës së Kryeqytetit është “mëse i nevojshëm” dhe po qëndron “i gatshëm” prej vitesh.
Një ditë pasi i kërkoi publikisht kryeministrit Albin Kurti që ta “zhbllokojë” nisjen e këtij projekti, Rama tha në Frontal në T7 se “përfitimet puro politike partiake apo egoiste duhet të lihen mbrapa”.
Rama tha se Kurti nuk e ka paraparë se ai s’do të jetë kryetar i Prishtinës, por tha se edhe ai s’e ka paraparë që Lëvizja Vetëvendosje do t’i fitonte zgjedhjet aq bindshëm.
“Ai e ka paraparë që unë nuk do të jem. Edhe unë nuk e kam paraparë, me të tregu të drejtën, që do t’i fitojë ai 51.11%, kështu që duhet me i rishqyrtu pozicionet”, tha ai.
“Ne jemi të zgjedhur nga qytetarët dhe kemi nevojë për bashkëpunim të mirëfilltë që t’i shtyjmë këto procese madhore”, tha Rama.
Ai tha se projektet e Komunës së Prishtinës janë edhe “për të mirën” e Kurtit dhe familjes së tij.
