Në rrugën “Lekë Dukagjini” në lagjen “Dardania” në Prishtinë, janë përleshur disa persona dhe si pasojë njëri nga ta është dërguar për trajtim në QKUK për shkak të lëndimeve që i mori nga përleshja me thikë. Policia e ka konfirmuar për Gazetën Express se personat e dyshuar kishin edhe armë zjarri.
Si pasojë e përleshjes në mes të disa personave që ndodhi sot rreth orës 11:30 në lagjen “Dardania” në Prishtinë, një person është dërguar në QKUK pasi ka marrë lëndime nga thika, dhe dy persona janë arrestuar.
“F. B, mashkull , 19 vjeç, shtetas i Republikës së Kosovës ka marrë plagë nga arma e ftohët (thikë) dhe i njëjti menjëherë është dërguar në QKUK për trajtim mjekësor”, thuhet në njoftimin e policisë.
Dy automjete janë dëmtuar nga predhat, ka konfirmuar zëdhënësja e policisë Flora Ahmeti për Gazetën Express.
Lidhur me gjithë këtë ngjarje, me urdhër të Prokurorit të shtetit, janë hapur rastet, vrasje e rëndë në tentative dhe armëmbajtje pa leje, thuhet në komunikatën për media.
