Banorët e fshatit Çirez të komunës së Skenderajt kanë protestuar këto ditë.
Banorët e Çirezit janë duke protestuar tek zona ku gurëthyesit ushtrojnë veprimtarinë e tyre.
Këto protesta paqësore ishin si pasojë e problemeve që kanë nga copat e detonimit të minave, njofton Drenicapress.
Pas protestave ka reaguar edhe kryetari i Komunës së Skenderajt, Bekim Jashari.
Ai ka deklaruar se shqetësimet e banorëve të Cirezit janë edhe shqetësime të tij, dhe do të angazhohet për zgjdhjen e këtij problemi.
Për më tepër lexojeni deklaratën e Bekim Jasharit për shqetësimet e banorëve të Çirezit:
Deklaratë e kryetarit të Komunës së Skenderajt, z.Bekim Jashari, lidhur me shqetësimet e banorëve të fshatit Çirez
“Pas shqetësimeve të ngritura nga banorët e fshatit Çirez, lidhur me aktivitetin e gurthyesit në këtë fshat, i cili, sipas banorëve, po rrezikon jetën e tyre dhe po e ndot ambientin, ne si Komunë kemi ndërmarrë të gjitha veprimet në bazë të kompetencave dhe përgjegjësive që kemi, për të gjetur një zgjidhje dhe për të tejkaluar situatën e paraqitur.
Pa i dhënë konotacion politik këtij problemi, do të jam përkrah banorëve të fshatit Çirez, dhe do të bëjë ç’është e mundshme në bazë të autorizimeve që kam, që problemin në fjalë ta zgjidhim sa më shpejt që është e mundur.
Komuna e Skenderajt është në pritje të vlerësimit nga inspektorët e Ministrisë së Mjedisit dhe Planifikimit Hapësinor, të cilët kanë dal në terren për të parë nga afër situatën.
Si kryetar i Komunës, pa asnjë dyshim, do të jem në krah të banorëve dhe problemeve që ata kanë.
Shqetësimet e banorëve të Çirezit, janë edhe shqetësime të mia”.
