Në orët e para të mëngjesit të sotëm policia e Fierit është njoftuar se në lagjen “29 Nëntori”, pranë banesës së shtetasit M.M, disa persona kanë tentuar të hyjnë brenda duke thyer drynin e derës.
Forcat e policisë me të mbërritur në vendngjarje kanë hasur në rezistencën e hajdutëve të cilët kanë qëlluar me pistoletë dhe automatik.
Nga shkëmbimi i zjarrit, njëri nga autorët është plagosur dhe një tjetër ka gjetur vdekjen.
Njoftimi i policisë
Të dy ata ishin të maskuar e të armatosur me pistoleta, të cilat u sekuestruan në cilësinë e provës materiale.
Autorët e tjerë, që dyshohet se janë edhe dy, duke qëlluar në drejtim të punonjësve të policisë janë larguar duke përfituar nga errësira dhe kushtet e motit, me një mjet ende të paidentifikuar.
Nga radhët e Policisë së Shtetit nuk ka të lënduar.
Menjëherë janë ngritur pika të shumta kontrolli në të gjitha hyrje-daljet e qytetit dhe po vijon puna për kapjen e autorëve të tjerë.
Në vendin e ngjarjes janë sekuestruar një numër i konsiderueshëm provash materiale.
Nën drejtimin e një grupi të posacëm të Prokurorisë, i cili gjendet në vendngjarje, po vazhdon puna për dokumentimin e plotë të kësaj ngjarje.
