Shefja e Grupit Parlamentar të Lëvizjes Vetëvendosje, Arbërie Nagavci, ka deklaruar pas mbledhjes së Kryesisë së Kuvendit se veprimet për zgjedhjen e presidentit do të intensifikohen gjatë këtyre ditëve, brenda afatit të dhënë nga Gjykata Kushtetuese.
Nagavci ka treguar se kryeministri Albin Kurti ka zhvilluar takim me kryetarin e LDK-së, Lumir Abdixhiku, duke theksuar se po vazhdon angazhimi maksimal për zgjedhjen e presidentit.
“Besoj që gjatë këtyre ditëve do të intensifikojmë përpjekjet për të gjetur një zgjidhje dhe që presidenti të votohet brenda afatit të Kushtetueses, sepse vendit i duhet një president i zgjedhur në Kuvend. Zgjedhjet e reja nuk do të sjellin rezultat tjetër dhe janë të panevojshme”, ka thënë Nagavci.
