Njohësi i sigurisë, Agim Musliu, ka bërë publike detaje lidhur me Aleksandar Arsenijeviqin, duke e akuzuar për bashkëpunim me Millan Radoiçiqin dhe përfshirje në aktivitete destabilizuese në veri të Kosovës.
Në një postim në Facebook, Musliu deklaroi se Aleksandar Arsenijeviq, “opozitari” i Listës Serbe, pas arratisjes në Serbi, nuk ka mbetur pa shpërblim për detyrat e kryera me sukses.
Njohësi i sigurisë tha se Arsenijeviqi është strehuar në një banesë në qytetin ‘Vrnjacka Banja’ në Serbi, e cila ia është dhuruar nga Millan Radoiçiqi si “falënderim për rolin dhe përpjekjet e tij për destabilizim të situatës në Kosovë.”
Sipas Musliut, Arsenijeviqi, i njohur si aktivist i shoqërisë civile, në prapaskenë ka ndihmuar në zbatimin e agjendave destabilizuese të Beogradit në veri të Kosovës dhe vazhdon të mbështetet financiarisht nga struktura që operojnë jashtëligjshëm.
Ai gjithashtu theksoi se gjatë bastisjes së villës së Arsenijeviqit në fshatin Vallaq në qershor, policia gjeti një arsenal të tërë armësh.
Musliu sqaroi se vila është ndërtuar nga kompania “RAD 028”, e cila është në listën e zezë të SHBA-ve dhe menaxhohet me letra nga Radulle Steviq, por në fakt është pronë e Millan Radoiçiçit.
“Vila më herët është përdorur nga ‘Mbrojtja Civile’ dhe ‘Severna Brigada’ për vëzhgim të Policisë së Kosovës dhe KFOR-it,” tha Musliu.
Ai shtoi se kjo tregon përpjekjet e vazhdueshme të Serbisë dhe Radoiciqit për të shfrytëzuar organizata dhe individë të caktuar nga serbët e Kosovës për qëllime destabilizimi dhe propagande ndaj Republikës së Kosovës, duke i fshehur pas profileve të “aktivistëve të shoqërisë civile.”
