Një miliarder gjerman është zhdukur në malet e Zvicrës ku kishte shkuar për të skijuar, shkruajnë mediat ndërkombëtare, transmeton Gazeta Metro.
Shefi i gjigantit Tengelmann, Karl-Erivan Haub, është zhdukur dhe kërkimet për të nuk kanë rezultuar në asgjë të re, ka bërë të ditur kompania gjermane të mërkurën.
“Ekipet e kërkimit po bëjnë çdo gjë që është e mundur për ta gjetur 58 vjeçarin Karl-Erivan Haub, pasi ai nuk u kthye nga një udhëtim turistik skijimi në Alpet zvicerane”, thuhet në komunikatën e kompanisë.
Ndërkohë, vëllai i tij, Christian, tha që ai është turist me përvojë i zonave malore dhe pavarësisht kohës që ka kaluar, familja vazhdon të mbajë shpresë se ai do të kthehet shëndosh në shtëpi nga udhëtimi.
Familja e miliarderit të zhdukur është një ndër më të pasurat në botë. Revista Forbes e kishte renditur atë në vendin e 265’të të njerëzve më të pasur.
