La Gazzetta dello Sport raporton se Juventus do të detyrohet të dëgjojë oferta për Khephren Thuram, Pierre Kalulu dhe Gleison Bremer nëse dështon të sigurojë kualifikimin në UEFA Champions League këtë sezon.
Juventus viziton Atalanta të shtunën në mbrëmje në një ndeshje vendimtare të Serie A, në garën për një vend në Champions League.
“Bianconerët” sapo kanë konfirmuar vazhdimin e kontratës së Luciano Spalletti deri në qershor 2028, por ende po luftojnë për një vend në katërshen e parë, duke u renditur të pestët, një pikë poshtë Como.
Mungesa e futbollit në UEFA Champions League sezonin e ardhshëm jo vetëm që do të ndikonte në buxhetin për transferime të reja, por do ta detyronte klubin të shesë disa nga yjet e tij për të balancuar financat.
Sipas Gazzetta-s, reprezentuesi francez Khephren Thuram është një nga lojtarët që mund të largohet, pasi 25-vjeçari u transferua në Torino për vetëm 20 milionë euro dy vite më parë dhe ka një kosto të ulët amortizimi në bilanc.
E njëjta gjë vlen edhe për bashkëkombasin e tij Pierre Kalulu, i cili iu bashkua Juventusit nga Milani për 17.3 milionë euro.
Gazzetta konfirmon se Juventus do të detyrohet gjithashtu të dëgjojë oferta për Gleison Bremer. Në mars, Tuttosport raportoi se mbrojtësi brazilian ka një çmim rreth 60 milionë euro për verën e ardhshme.
