Ministria e Industrisë, Ndërmarrësisë dhe Tregtisë (MINT) ka bërë të ditur çmimet maksimale të lejuara për shitjen e derivateve të naftës në Kosovë për periudhën 12-13 prill 2026, ku është regjistruar një ulje e lehtë e çmimeve në krahasim me periudhën paraprake.
Sipas vendimit zyrtar, çmimi i naftës (dizelit) është caktuar në 1.84 euro për litër, duke shënuar një rënie prej rreth 2 centësh. Ndërkohë, benzina është vendosur në 1.44 euro për litër, ndërsa çmimi i gazit në 0.89 euro për litër, shkruan lajmi.net.
Autoritetet kanë sqaruar se këto janë çmime tavan dhe vlejnë për shitjen me pakicë në të gjithë territorin e Republikës së Kosovës. Qëllimi i këtij rregullimi, sipas Ministrisë, është stabilizimi i tregut të karburanteve dhe parandalimi i abuzimeve të mundshme nga operatorët ekonomikë.
MINT thekson se ndryshimet në çmimet e derivateve lidhen drejtpërdrejt me lëvizjet në bursat ndërkombëtare të naftës, si dhe me kursin e këmbimit valutor, faktorë që ndikojnë në mënyrë të vazhdueshme në formimin e çmimeve finale për konsumatorët në vend.
Po ashtu, Ministria e Industrisë, Ndërmarrësisë dhe Tregtisë ka bërë të ditur se do të vazhdojë monitorimin e rregullt të tregut të derivateve, me synim rritjen e transparencës dhe mbrojtjen e konsumatorëve nga luhatjet e pajustifikuara të çmimeve në treg. /Lajmi.net/
