Në Skenderaj është vendosur tenda para QKMF-së për identifikimin e rasteve të dyshimta me COVID-19, përcjellë Drenica Press.
Në një njoftim nga Komuna e Skenderajt ndër të tjera thuhet: “Qendra Kryesore e Mjekësisë Familjare në Skenderaj ka vazhduar aktivitetet në kuadër të përpjekjeve për mbrojtjen e shëndetit të qytetarëve nga pandemia COVID 19.
Nga dje me 14. 03. 2020, në hyrje të objektit të QKMF-së është vendosur tenda me qëllim të identifikimit të hershëm të rasteve të dyshimta me koronovirus. Këtu pacientët e kanë kontaktin e parë me mjekun. Në këtë pikë identifikohen rastet e dyshimta dhe ato menjëherë izolohen. Hapat e mëtejmë bëhen në konsultim me IKSHP.
Po ashtu, sot është bërë dezinfektimi i të gjitha hapësirave të QKMF-së , pajisjeve si dhe auto ambulancave. Stafi është i mobilizuar dhe për momentin mirë i pajisur me pajisje mbrojtëse.
Një ekip mobil, gjendet në pikën kufitare në Jarinjë, me qëllim të detektimit të hershëm të rasteve, udhëtarëve që hyjnë përmes kësaj pike kufitare.
QKMF është e përkushtuar që me gjithë potencialin që kanë të japim krejt atë që është e mundur në mbrojtjen e shëndetit të qytetarëve.
Një kujdes i veçantë është duke i’u kushtuar mbrojtjës së pacientëve të cilët vijnë për shërbime tjera dhe të cilët nuk duhet t’i ekspozohen rrezikut eventual për infeksion.
Komuna Skenderaj apelon tek qytetarët që t’i përmbahen masave të ndermarra nga Shtabi Emergjent Skenderaj dhe Qeveria e Kosovës.
Linja telefonike falas 194 e Qendrës Operative Emergjente Lokale, vazhdon të jetë në dispozicion për të gjithë qytetarët që mund të kenë probleme shëndetësore;
Personat që kanë dyshime se janë infektuar me virus të vetë izolohen dhe të kërkojnë ndihmë në linjën telefonike falas 194 ose 038/200 80 800, pa pasur nevojë të paraqiten në QKMF, ekipi mobil do të intervenojë shpejtë.
Pa panik, por me kujdes të shtuar!
