Dyshohet se 17 vjeçari, Sh.R. (gazeta e di identitetin e tij) shkrepi mbi tre plumba në drejtim të Mentor Aliut, rreth 25 vjeç, i cili, sipas ekipit mjekësor, ndërroi jetë në vendin e ngjarjes. Të dy janë nga qyteti i Ferizajt.
Gazeta Express mëson nga burime të sigurta brenda organeve të hetuesisë se vrasja ndodhi për shkak të një hakmarrjeje.
Rasti po hetohet si “vrasje e rëndë” që sipas policisë ndodhi rreth orës 12:30 në rrugën ”Ahmet Kaqiku” në Ferizaj. Në vendin e ngjarjes kanë dalë njësitet policore si dhe ekipi mjekësor, ku pas ekzaminimit nga ana e mjekut është konfirmuar se viktima e rastit Mentor Aliu kishte ndërruar jetë.
Pas hetimeve fillestare, hetuesit policor kanë arrestuar të dyshuarin kryesor lidhur me këtë rast. Bëhet fjalë për SH.R., 17-vjeçar. Njëherit është gjetur dhe konfiskuar arma me të cilën dyshohet se është kryer vepra.
“Në vendin e ngjarjes ka dalë edhe Prokurori i Shtetit dhe me urdhër të tij trupi i pajetë i viktimës është dërguar në Institutin e Mjekësisë Ligjore në Prishtinë për obduksion”, tha policia.
