Kryetari i Lëvizjes Vetëvendosje Albin Kurti i ka quajtur suksese të mëdha fitoret e kandidatëve të kësaj partie në Mitrovicë, Fushë Kosovë e Obiliq, ndonëse e pranoi se kanë pritur rezultate më të mira në balotazh.
Kurti falënderoi kandidatët e tij për kryetarë komune, pasi që sipas tij kanë pasur një betejë të jashtëzakonshme.
“Falënderoj të gjithë qytetarët që shfrytëzuan te drejtën për të zgjedhur në mënyrë demokratike.. Është hera e katërt që LVV merr pjesë në zgjedhje lokale. Nga të dhënat që kemi marrë nga komisionarët tanë kësaj radhe kemi fituar në shtatë komuna. Ky është një sukses i LVV-së, natyrisht kemi synuar më shumë se kaq. Është e qartë që kemi fituar edhe në Mitrovicë, Fushë-Kosovë dhe Obiliq. Falënderoj kandidatët tanë dhe aktivistët tanë të cilët kanë pasur betejë të jashtëzakonshme meqenëse në të gjitha këto raste të gjithë të tjerët janë bashkuar kundër LVV-së. Vetëvendosje është ballafaquar me të përbashkëtën e tyre, e cila është një situatë e paprecedent në historinë politike elektorale të Kosovës, andaj ky është një sukses”, tha Kurti.
Kryetari i VV-së shtoi se po presin rezultatet edhe në komunat e tjera. Tashmë ai është nisur për të festuar fitoren në Fushë-Kosovë, Obiliq e Mitrovicë.
