Kurti pas nderimeve shtetërore për Mlladiqin: Nga dita e djeshme, mohimi është fjalë e pamjaftueshme – Serbia ka kaluar në adhurim shtetëror të gjenocidit

Kryeministri në detyrë i Kosovës, Albin Kurti, ka reaguar pas ceremonisë së varrimit të ish-komandantit të forcave serbe të Bosnjës, Ratko Mlladiq, duke e kritikuar ashpër Serbinë për mënyrën se si e ka përcjellë atë.

Në një postim në Facebook, Kurti ka krahasuar mënyrën se si në Kosovë janë shënuar ditët e fundit disa prej ngjarjeve të rëndësishme historike dhe kombëtare, me ceremoninë shtetërore të organizuar në Serbi për Mlladiqin.

Ai ka përmendur 27-vjetorin e themelimit të Policisë së Kosovës, 29-vjetorin e vdekjes së Nënë Terezës, si dhe përvjetorin e Kushtetutës së Kaçanikut.

Në anën tjetër, Kurti ka thënë se Serbia fundjavën e ka kaluar duke u përgatitur për ceremoninë e varrimit të Mlladiqit, të cilin e ka cilësuar si përgjegjës për gjenocidin në Srebrenicë, ku në korrik të vitit 1995 u vranë mijëra boshnjakë.

“Gjenocidi në Srebrenicë është fakt historik i dëshmuar nga varrezat masive, identifikimet forenzike të mijëra viktimave, dëshmitë e të mbijetuarve dhe dokumentimi i hollësishëm i operacionit të vrasjes dhe fshehjes së trupave, jo interpretim historik apo akuzë politike”, ka shkruar Kurti.

Ai ka kritikuar institucionet serbe për ceremoninë e organizuar për Mlladiqin, duke thënë se shteti që për vite nuk e kishte dorëzuar atë para drejtësisë, tash e ka përcjellë me nderime shtetërore.

“Shteti që për vite nuk e dorëzoi te drejtësia, dje e solli kufomën e tij me aeroplan qeveritar, e mbështolli me flamur dhe e përcolli me ushtri, ministra, klerikë të lartë e orkestër. Kështu mohimi i gjenocidit kaloi nga deklarata politike në liturgji shtetërore”, ka deklaruar Kurti.