Kandidati i Vetëvendosjes për kryeministër, Albin Kurti, ka refuzuar të flasë për ish-partnerin e tij, Dardan Molliqaj, dhe sulmin fizik për të cilin e ka akuzuar Haki Abazi i VV-së.
Pasi u kthye nga Gjermania, Kurti sot vizitoi Prizrenin nga ku foli për fitoren që, sipas tij, do ta korrë Vetëvendosje në zgjedhjet e 6 qershorit.
Lideri i VV-së, kur u pyet rreth kandidatit për deputet të koalicionit AAK – PSD, Dardan Molliqaj, refuzoi të fliste për të.
“A hala po merreni me të a?”, i tha Kurti gazetarit kur e pyeti rreth incidentit pas emisionit “Pressing” të mërkurën, për të cilin akuzohet Molliqaj.
Dardan Molliqaj dhe kandidati i VV-së për deputet, Haki Abazi, të mërkurën në Pressing patën një debat të ashpër, e menjëherë pas emisionit, Abazi tha se ish-deputeti i VV-së e ka sulmuar fizikisht.
Diçka të tillë e ka mohuar Molliqaj, ndërsa Vetëvendosja ka dalë me komunikatë ku e ka quajtur anëtarin e PSD-së “bandit”.
Prokuroria Themelore e Prishtinës dje kanë intervistuar Molliqajn, Abazin dhe Rexhep Hotin nga radhët e PDK-së, që sipas kandidatit të VV-së, ka qenë i pranishëm kur e ka sulmuar Molliqaj. /Express/
