“E imagjinoj çdo ditë kthimin e babit, një hero që kthehet në tokën e tij e në shtetin që e shpalli të pavarur” Rrëfimi i Endritit për babain disa muaj para vendimit të Hagës

Kanë mbetur më pak se një muaj, para se Gjykata Speciale në Hagë të marrë vendim për ish krerët e UÇK-së në Hagë, saktësisht Hashim Thaçin, Kadri Veselin, Jakup Krasniqin dhe Rexhep Selimin.

Këta të katërt, të cilët janë privuar nga liria tash e pothuajse gjashtë vite, po i afrohen çdo ditë e më shumë ditës së madhe, ku pritet vendim për shpalljen e tyre të pafajshëm apo jo.

Derisa po numërohen ditët deri më 16 shtator, këto ditë po vazhdojnë të jenë të vështira për ta e gjithashtu për familjet e tyre.

Djali i Hashim Thaçit, Endrit Thaçi disa muaj më parë, në një intervistë për Top Channel, ka shprehur mungesën e madhe për babain e tij, kreun e familjes dhe ish-kreun e shtetit.

Ai ka treguar se në çdo moment të jetës së tij, e imagjinon kthimin e babait të tij.

“Sa herë që shkoj për të fjetur apo kur çohem në mëngjes, e imagjinoj kthimin e babait. Imagjinoj një hero që kthehet në tokën e tij, në shtetin që e ka shpallur të pavarur dhe sovran.” – rrëfeu ai, pasi ishte vetëm 21 vjeç kur i ati u ndalua në Hagë bashkë me ish-krerë të tjerë të UÇK-së, me akuza që lidhen me luftën në Kosovë kundrejt forcave serbe.

Hashim Thaçi, Kadri Veseli, Rexhep Selimi dhe Jakup Krasniqi u arrestuan nga Zyra e Prokurorit të Specializuar më 4 dhe 5 nëntor 2020, pas konfirmimit të aktakuzës nga gjyqtari i procedurës paraprake më 26 tetor të po atij viti. Ata u transferuan menjëherë në objektin e paraburgimit të Dhomave të Specializuara të Kosovës në Hagë.