Përfaqësuesja e Kosovës e zhvilloi mbrëmë miqësoren me Shqipërinë, të cilën e mposhti me rezultat të pastër, 3:0, shkruan zeri.info.
Dhe, pas anulimit të miqësores me Bregun e Fildishtë, Federata e Futbollit të Kosovës po bën përpjekje për gjetjen e një kundërshtari për miqësoren e radhës, që do të zhvillohej këtë javë.
Deri tash, në opsion ishin Kongo dhe Moldavia, por së fundmi ka dalë edhe opsioni i tretë.
Lajmin e ka bërë të ditur sot për “Zërin” përzgjedhësi i Kosovës, Bernard Challandes.
“Nuk e di nëse do të luajmë të shtunën apo jo, sepse loja me Bregun e Fildishtë është anuluar. Kjo nënkupton se ne do të ushtrojmë sot, por nuk e dimë nëse është përgatitje për lojën e dytë apo është vetëm përgatitje për të ardhmen”, ka thënë fillimisht trajneri zviceran për gazetën.
“Nëse nuk kemi kundërshtar për fundjavë, të premten të gjithë lojtarët mund të shkojnë në shtëpi dhe t’i shijojnë pushimet. Ose, nëse shkojmë në Turqi, të premten ushtrojmë në mëngjes dhe në mbrëmje luajmë kundër Iranit, sepse ky ekip është në kërkim të një kundërshtari për përgatitje për Botërorin e Rusisë. Do të ishte një kundërshtar mjaft i mirë. Pra i kemi dy zgjidhje: ose të përgatitemi për shtator, kur na pret Liga e Kombeve, ose ta luajmë miqësoren e qershorit”, ka shtuar Challandes për “Zërin”
