Prishtinë: Shkoi në stacion policor për t’u ankuar për qiradhënësin, përfundon duke sulmuar dy policë

Një person ka sulmuar fizikisht dy zyrtarë policorë në Stacionin Policor-Jugu në Prishtinë, ku kishte shkuar për të raportuar një mosmarrëveshje me qiradhënësin.

Sipas raportit 24-orësh të Policisë, rasti ka ndodhur të hënën, më 12 tetor, rreth orës 12:50.

“I dyshuari mashkull kosovar, derisa ka qenë në stacion policor për të raportuar një mosmarrëveshje me një qiradhënës, ka shfaqur shenja të nervozës dhe ka sulmuar fizikisht dy zyrtarë policorë”, thuhet në raportin e Policisë.

I dyshuari është arrestuar, ndërsa me urdhër të prokurorit është dërguar për trajtim në Forenzikën e Psikiatrisë në QKUK, në Prishtinë.