Në tetorin e vitit të kaluar, Aleancës për Ardhmërinë e Kosovës (AAK) i është bashkuar ish-gazetari shumëvjeçar, Veli Bytyqi. Aderimi i tij kishte bërë bujë të madhe si brenda partisë ashtu edhe në media. Madje është vet lideri i AAK-së, Ramush Haradinaj i cili në një emision në RTK, aderimin e Veli Bytyqit dhe të profesoreshës Elmaze Nura i kishte vlerësuar si dy prurjet më të mëdha në AAK. Por vetëm pak muaj pas këtij aderimi, Veli Bytyqi ka vendosur që kontributin e tij ta jap të Presidenti Thaçi. Ky i fundit duke e parë Bytyqin të paangazhuar diku në jetën politike, i ka ofruar atij postin e këshilltarit politik.
Bytyqi e konfirmoi për Indeksonline se prej sot është pjesë e ekipit të Presidentit por thotë se nuk ka ndërruar ende parti.
“Unë nuk kam lëvizë nga partia, në kuptimin konkret. Kam qenë në AAK dhe kam qenë këshilltar i Ramush Haradinajt në parti, jo në kabinet. Me thënë të drejtën unë Presidencën e shoh si institucion jopartiak dhe kam kaluar atje si këshilltar. Kjo ka qenë preferenca e presidentit dhe jam emëruar me vendim të presidentit Thaçi si këshilltar i tij politik”, ka deklaruar Bytyqi për Indeksonline.
Ish gazetari thotë se nuk e ka lënë parinë e Hardinajt ende, pavarësisht kësaj lëvizje.
“Kam kaluar atje si këshilltar politik, por pa ndryshuar parti sepse presidenti Thaçi nuk përfaqëson më partitë. Të gjithë e dimë kush ku mbahet e qysh, por ai nuk mund të thotë më se është me PDK-në, për sa kohë sa është president”, ka deklaruar ndër të tjera Bytyqi.
Ai e falënderon Thaçin dhe i është shumë mirënjohës për besimin që ja ka dhënë. “Ndihem i nderuar që ai më ka ftuar të jem këshilltar i tij, edhe e vlerësoj si gjest dhe si veprim sepse presidenti përfaqëson unitet”, ka thënë ai.
Veli Bytyqi ka qenë gazetar shumëvjeçar i Rilindjes, redaktor, zv/kryeredaktor. Ai ka qenë edhe drejtor për marrëdhënie me publikun dhe zëdhënës i komunës së Prishtinës 2001-2004 si dhe këshilltar e zëdhënës i Ministrisë së Kulturës në vitet 2004-2007.
Veli Bytyqi ka qenë pjesëmarrës i aktiviteteve politike e kombëtare qysh në vitet 90-ta, deputet i Kuvendit të Kosovës i vitit 1992, nënkryetar i PSHDK-së, pjesëmarrës i aktiviteteve të shumta para, gjatë e pas luftës në Kosovë.
