Sot shënohen dy vjet nga sulmi terrorist në Banjskë të Zveçanit, ku ra heroikisht në krye të detyrës rreshteri i Policisë së Kosovës, Afrim Bunjaku. Nga ky sulm i udhëhequr nga Millan Radoiçiq dhe grupi i tij, mbeti i plagosur polici Alban Rashiti dhe u lëndua një tjetër pjesëtar i Policisë së Kosovës.
Ky sulm, i cili kishte për qëllim destabilizimin dhe aneksimin e katër komunave veriore, u zmbraps nga forcat e rendit, por edhe sot, sipas autoriteteve të sigurisë, mbeten grupe që tentojnë të nxisin tensione.
Drejtori i Policisë së Kosovës, Gazmend Hoxha, tha se edhe pas dy vitesh, disa mbetje të këtyre grupeve vazhdojnë të paraqesin rrezik për stabilitetin në veri.
“Vazhdojnë të mbesin disa mbeturina të këtyre grupeve, të cilat akoma tentojnë të prishin rendin dhe qetësinë publike dhe të kërcënojnë qytetarët tanë atje, si dhe njësitet e policisë dhe institucionet e sigurisë së Kosovës. Mirëpo mund të themi që akoma ka potencial për të shkaktuar ndonjë problem në veri të vendit. Policia e Kosovës dhe institucionet e tjera të sigurisë, në bashkëpunim me KFOR-in, po punojnë që të garantojnë sa më shumë rend dhe siguri për qytetarët tanë”, u shpreh Hoxha për Tëvë1.
Ai shtoi se çdo informacion për këto grupe trajtohet me seriozitet dhe institucionet veprojnë në përputhje me ligjin.
“Operacionet do të vazhdojnë. Kudo që ka informacione, ne do të reagojmë, bazuar në ligj, në procedura dhe duke komunikuar me prokurorinë e gjykatat tona”, theksoi ai.
Hoxha rikujtoi se sulmi i 24 shtatorit 2023 ishte një tentativë për të krijuar kaos dhe ndryshim të situatës në veri, por Policia e Kosovës arriti ta zmbraps me sukses.
“Fatmirësisht Policia e Kosovës arriti me sukses ta zmbraps këtë sulm. Edhe pse humbëm heroin tonë, rreshterin Afrim Bunjaku, arritëm të pengojmë një skenar që kishte për qëllim të shkaktonte kaos të madh dhe të krijonte një realitet të ri në veriun e vendit tonë”, tha Hoxha.
Ai tregoi se njësitë policore reaguan menjëherë dhe me profesionalizëm.
“Njësitë tona policore, duke përfshirë stacionin policor të Zveçanit, të cilit i priu heroi Afrim Bunjaku, njësitë kufitare dhe më vonë njësitë speciale të Policisë së Kosovës, u ballafaquan me sukses me grupin terrorist, duke eliminuar tre prej tyre dhe duke arrestuar të tjerë. Operacioni zgjati disa ditë, fillimisht me përballje të armatosur, e më pas me aksione për pastrimin e terrenit dhe garantimin e rendit publik”, theksoi ai.
Drejtori i Policisë vuri në pah se pavarësisht intensitetit të sulmit, nuk pati dëme në popullatën civile, në pronat e qytetarëve dhe as në Manastirin e Banjskës.
“E mira e gjithë këtij operacioni ishte që, përveç humbjes së heroit Bunjaku dhe disa të lënduarve të lehtë, nuk pati pasoja të tjera as për policët tanë, as për civilët. Nuk pati dëme në shtëpi e prona, as në Manastir, ku në atë kohë ndodheshin edhe pelegrinë e turistë, të cilët u trajtuan siç duhet dhe nuk patën ndonjë telashe”, deklaroi Hoxha.
Dy vjet pas kësaj ngjarjeje, institucionet e sigurisë së Kosovës thonë se do të vazhdojnë të jenë vigjilente, për të parandaluar çdo përpjekje për destabilizim në veri të vendit.
