Deputeti i Parlamentit të Kosovës, Bekim Haxhiu, ka thënë se nisja e trenit nga Beogradi në Mitrovicë është ndërhyrje e Serbisë në Kosovë, që ka synim destabilizimin e rajonit.
“Kjo është ndërhyrje direkte e Serbisë në Kosovë, prandaj Qeveria e Kosovës duhet të jetë në nivelin e përgjegjësisë për të ndaluar çdo mjet që hyn ilegalisht në Kosovë.”
“Me ndërtimin e murit në veri, me nderhyrje në hekurudhat e Kosovës, Qeveria e Serbisë po kërkon destabilizim të rajonit”, ka thënë Haxhiu.
Ai ka shtuar se Serbia po provokon një konflikt të ri, dhe se qytetarët dhe institucionet shtetërore duhet të jenë të përgaditura.
“Serbia po provokon të filloj një konflikt të ri në veri, prandaj ne duhet të jemi të pergaditur për këtë, si institucione shtetërore dhe si qytetarë”, ka shtuar Haxhiu.
Për deputetin e PDK-së, nuk ka normalizim dhe stabilitet të rajonit pa njohjen reciproke të Kosovës nga Serbia.
“Ri definimi i formatit të bisedimeve që po zhvillohen në Bruksel është më se i nevojshëm, nuk ka asnjë hap tutje pa shuarjen e të gjitha strukturave paralele të Serbisë.
“Nuk ka normalizim dhe stabilitet të rajonit pa njohjen reciproke të Kosovës dhe Serbisë si shtete të pavarura”, ka thënë Haxhiu./Drenicapress.info/
