Kryetari i Aleancës për Ardhmërinë e Kosovës (AAK), Ramush Haradinaj, ka deklaruar se mbështetja për Aleancën po vazhdon të rritet në të gjitha qytetet e Kosovës, duke theksuar se tubimi elektoral i mbajtur në Klinë dëshmoi përkrahje të fuqishme dhe besim të qytetarëve ndaj programit të AAK-së.
Haradinaj bëri të ditur se para qytetarëve të Klinës u prezantua plani katërvjeçar i Aleancës, i cili, sipas tij, është ndërtuar mbi nevojat reale të qytetarëve dhe synon përmirësimin e jetës së individit, fuqizimin e familjes dhe forcimin e interesit të përbashkët shoqëror.
Ai theksoi se vizioni i AAK-së është i orientuar drejt stabilitetit institucional, zhvillimit ekonomik dhe krijimit të një perspektive të qëndrueshme për vendin.
“Klina është krah një vizioni që synon një Kosovë më të qëndrueshme, më të fortë dhe me rrugë të qartë drejt së ardhmes”, ka deklaruar Haradinaj pas tubimit./Indeksonline/
