Hapet peticioni i Vetëvendosjes, me kërkesën për zgjedhje
Lëvizja Vetëvendosje edhe zyrtarisht ka nisur peticionin për të kërkuar zgjedhje.
Siç bëhet e ditur, në peticion janë të nevojshme të shkruhet emri, mbiemri, numri personal dhe adresa.
Peticioni, sipas VV-së, përfundon më 30 qershor, që i bie edhe 30 ditë, 2 orë e 10 minuta.
“Kosova ka nevojë për zgjedhje të reja sepse vetëm përmes tyre mund të ketë legjitimitet qeverisja e re. Për të dalë nga kjo krizë, si hap të parë po mbledhim nënshkrimet për peticionin që ka vetëm këtë kërkesë: zgjedhje të reja. Jo qeveri pa zgjedhje e për vjedhje. Jo qeveri për ndarje e copëtim. Por zgjedhje, demokraci e zhvillim”, thuhet në thirrjen e VV-së.
VV-ja thotë se Kosova ka nevojë të menjëhershme për zgjedhje, që të zgjidhet kriza politike dhe të përcaktohet rruga që do të marrë vendi: drejt ndryshimit dhe çlirimit prej korrupsionit, apo drejt rikthimit të të korruptuarve.
Lexo edheSami Lushtaku shpall kandidaturen për Kryetar të Komunës së Skënderajt në vitin 2021
“Me këtë peticion ne, qytetarët e Kosovës, duke vendosur nënshkrimin dhe numrin e letërnjoftimit, bëjmë të ditur se duam zgjedhje, e se vetëm qeveria e dalë nga zgjedhjet ka legjitimitet për të qeverisur. Veprimet në Kuvendin e Kosovës në 25 mars 2020 treguan se partitë e vjetra, PDK, LDK, AAK, Nisma dhe Lista Serbe, janë bërë bashkë kundër votës së qytetarëve. Ata nuk mundën ta durojnë një shtet të drejtë, që i largon të korruptuarit dhe nuk merr rroga të larta për vete, por i çon paratë në ndihmë të popullit, të ekonomisë e shëndetësisë. Ndërsa vendimi i Gjykatës Kushtetuese në 28 maj 2020, tregon se sa i kapur prej partive të vjetra është shteti e drejtësia. Aty ku kriminelët janë mbi gjykatat, të vetmit që ndëshkohen janë qytetarët”, thotë Vetëvendosje.
Në fund, thuhet se “Të dhënat e personale të çdo qytetarit të Republikës së Kosovës që nënshkruan këtë peticion, garantojmë që do të rruhen në pajtim me LIGJIN NR. 06/L-082 PËR MBROJTJEN E TË DHËNAVE PERSONALE”.
