Nëse përdorni Gmail, posta juaj elektronike po bëhet shumë më inteligjente.
Google ka konfirmuar një përditësim të madh që synon të bëjë dërgimin e email-eve më të shpejtë dhe më pak të lodhshëm, si dhe t’u ndihmojë miliardave përdorues të menaxhojnë më mirë kutitë e mbushura me mesazhe dhe të gjejnë emailet e vjetra me lehtësi.
Google përshkruan këtë përditësim si një përvojë të re që do të “transformojë kutinë tuaj të postës në një qendër komandimi më të dobishme, të personalizuar dhe të përshtatur për ju.”
Ky përmirësim fillimisht do të nisë në SHBA, ndërsa rajone të tjera do të ndjekin në muajt e ardhshëm. Kur të arrijë në Mbretërinë e Bashkuar, përdoruesit do të shohin tre funksione kryesore:
1. AI Overviews (Përmbledhje inteligjente):
Ky funksion lejon përdoruesit të kërkojnë emailet duke bërë pyetje në gjuhë të thjeshtë. Për shembull, mund të pyesni: “Kush ishte hidrauliku që më dha ofertën për riparimin e banjos vitin e kaluar?” Gmail jo vetëm që do të gjejë emailet përkatëse, por do të përmbledhë edhe informacionin më të rëndësishëm. Përmbledhjet inteligjente gjithashtu mund të kondensojnë biseda të gjata me email-e në pika të qarta dhe të përmbledhura, duke kursyer kohë.
2. Ndihma për shkrim:
Funksione të reja për përgjigje të mençura dhe mjete kompozimi ndihmojnë përdoruesit të shkruajnë dhe përmirësojnë emailet më lehtë, përfshirë edhe korrigjimin e gabimeve. Për shembull, në organizimin e një eventi familjar, Suggested Replies mund të sugjerojë menjëherë një përgjigje që përputhet me tonin dhe stilin tuaj të shkrimit.
3. Proofread (Korrigjim i avancuar):
Ky funksion, me pagesë shtesë, ofron sugjerime për gramatikën, tonin dhe stilin e email-eve përpara se t’i dërgoni. Funksionet Help Me Write dhe Suggested Replies do të jenë falas për të gjithë, ndërsa Proofread do të jetë i disponueshëm vetëm për abonentët Google AI Pro dhe Ultra.
Përditësimi gjithashtu sjell filtra inteligjentë për kutinë e postës, të cilët ndihmojnë në menaxhimin e mbingarkesës së emaileve, duke prioritizuar mesazhet e rëndësishme dhe duke dhënë një përmbledhje të detyrave dhe afateve.
Një tjetër funksion i ri, “Catch me up”, jep një përmbledhje të azhurnimeve të rëndësishme të jetës që gjenden në Gmail, si rezervime të ardhshme, porosi, blerje apo ngjarje të anuluara ose të shtyra.
Sipas Google: “Sot, 3 miliardë përdorues mbështeten tek Gmail për të komunikuar dhe për të përfunduar detyra. AI ka luajtur një rol të rëndësishëm në këtë – nga Smart Replies deri tek mbrojtja inteligjente kundër spam-it. Por emailet kanë evoluar ndjeshëm që nga nisja e Gmail-it në 2004. Me kutitë më të mbushura se kurrë, menaxhimi i informacionit është po aq i rëndësishëm sa menaxhimi i mesazheve. Prandaj po e çojmë Gmail-in në epokën Gemini, duke e kthyer atë në një asistent personal dhe proaktiv për kutinë tuaj të postës.” /GazetaExpress/
