Është shënuar 26-vjetori kur forcat serbe sulmuan familjen Jashari, me qëllim që ta pengonin mobilizimin shqiptar kundër okupatorit serb.
Në 30 dhjetorin e vitit 1991, në një ditë të ftohtë, për herë të parë forcat serbe sulmuan familjen Jashari, me qëllim që ta pengonin mobilizimin shqiptar kundër okupatorit serb.
Për ta shënuar 26-vjetorin e këtij sulmi, te Kompleksi Memorial ”Adem Jashari” bënë homazhe kryetari i Skenderajt, i cili është edhe djali i dëshmorit Hamëz Jashari, Bekim Jashari, kryetari i Drenasit, Ramiz Lladrovci dhe shumë qytetarë nga qytete të ndryshme të Kosovës.
Jashari: 30 dhjetori ka qenë acar i ftohtë
“Sot është një datë e veçantë, 30 dhjetori i vitit 1991 kam qenë edhe vetë pjesëmarrës, sot kemi ardhur më bë nderime dhe me përkujtuar atë ditë. 30 dhjetori ka qenë acar i ftohtë, por që ka simbolizuar me fillimin e thyerjes, të qarjes së okupatorit serb, iu tregu që kjo është tokë shqiptare dhe këtu sundojnë vetëm ata që jetojnë në këtë vend”, tha ai.
Lladrovci: 30 dhjetori fitorja e parë frontale e ushtrisë
“30 dhjetorin e vitit 1991 e kujtojmë si betejën e parë frontale të Adem Jasharit dhe bashkëluftëtarëve të tij, si dhe familjes së tij, me forcat serbe, të cilat kishin ardhur për ta arrestuar komandantin tonë.
Unë e kujtoj, atë ditë e kam marr lajmin shumë herët në mëngjes, kam qenë edhe vetë protagonist i kësaj ngjarje, ka qenë një ditë më borë të madhe, por që ishte një ditë e fitores së parë frontale të ushtrisë tonë në krye me komandantin legjendar, Adem Jashari”, tha ai.
Familja Jashari u sulmua për herë të dytë më 22 janar 1998 dhe sulmi i tretë ka ndodhur në marsin e po këtij viti, ku si pasojë e këtij sulmi ranë dëshmorë 20 anëtarët e kësaj familje, ndërsa 10 prej tyre shpëtuan.
