Ndërsa Evropa është duke dalë nga izolimi dhe duke raportuar shifra pozitive, pandemia duket se po shkakton sërish frikë në Korenë e Jugut ku janë rimbyllur më shumë se 200 shkolla të cilat i janë kthyer mësimit online.
Ndërkohë, situata vijon të jetë shqetësuese edhe në Brazil ku një ditë më parë u raportua për 26.417 raste të reja me coronavirus.
Edhe Autoritetet e Moskës kanë dyfishuar numrin zyrtar të vdekjeve nga Covid-19 për muajin prill. Drejtori rajonal i OBSH për Evropën, dr. Hans Kluge shprehet se është e pashmangshme një valë e dytë e virusit dhe një skenar i tillë nuk mund të përjashtohet.
Ai shton se është normale që shtetet t’i rikthehen jetës, por duhet të kihen parasysh të dhënat epidemiologjike dhe t’i kushtohet rëndësi tri elementëve; higjienës respiratore, distancës fizike dhe larjes së duarve.
