Po bëhet gjithnjë e më e mundshme që Real Madridi të kërkojë një trajner të ri gjatë verës, pasi pozita e Álvaro Arbeloas po duket gjithnjë e më e pasigurt.
Presidenti Florentino Pérez pritet të zgjedhë një trajner me përvojë, dhe një nga emrat kryesorë në këtë moment është José Mourinho.
Portugezi ka qenë më parë trajner i Real Madridit nga viti 2010 deri në 2013, ku fitoi La Ligan, Copa del Reyn dhe Superkupën e Spanjës.
Megjithatë, periudha e tij në klub nuk u konsiderua plotësisht e suksesshme, dhe ai shihet se ka “punë të papërfunduar” në “Bernabeu”, çka e bën të hapur për një rikthim.
Ideja e rikthimit të Mourinhos ka tërhequr një pjesë të tifozëve, por jo të gjithë janë të bindur.
Legjenda e klubit, Guti Hernández, ka shprehur dyshime për këtë mundësi, sipas “Marca”.
“Mourinho është një trajner i madh, por mendoj se kulmi i tij nuk është tani – duke pasur parasysh se vjen nga Fenerbahçe dhe ka qenë në një periudhë jo të mirë. Besoj se ka trajnerë në gjendje më të mirë se ai që do t’i zgjidhja”, tha ai.
Rikthimi i mundshëm i Mourinhos është një ide që është shqyrtuar nga drejtuesit e Real Madridit, megjithëse ende nuk është marrë një vendim konkret dhe nuk ka pasur kontakte zyrtare me trajnerin.
Aktualisht, vendimi përfundimtar lidhet me të ardhmen e Arbeloas.
Edhe pse Real Madridi ka ende shanse matematikore për të fituar La Ligan, Florentino Pérez nuk pritet të marrë një vendim derisa gjithçka të jetë e qartë.
Megjithatë, me Barcelonën shumë përpara dhe vetëm gjashtë ndeshje të mbetura, rreziku që madrilenët të mbyllin një tjetër sezon pa trofe madhor është real.
Nëse kjo ndodh, ndryshimet në klub duken të pashmangshme, me Arbeloan si kandidatin kryesor për t’u larguar./GazetaExpress/
