Zëvendëskryeministri i Kosovës, Fatmir Limaj, ka përkujtuar 20-vjetorin e masakrës së Rezallës ku u vranë mizorisht 98 martirë të pafajshëm.
Limaj ka thënë se masakra e Rezallës është një nga masakrat më të rënda mbi popullatën civile shqiptarë nga ana e forcave ushtarake e policore serbe.
“Dy dekada pas kryerjes së këtyre krimeve makabre, kryerësit e këtyre krimeve ende nuk kanë marrë ndëshkimin nga ana e institucioneve të drejtësisë.
Qeveria e Kosovës dhe Delegacioni Shtetëror për Bisedime nuk do të lënë gurë pa lëvizur derisa të gjenden kryerësit e këtyre krimeve dhe ta marrin dënimin e merituar”, ka shkruar Limaj në llogarinë e tij në ‘Facebook’.
Postimi i plotë i Limajt:
Sot bëhen 20 vjet nga masakra e Rezallës, ku forcat ushtarake e policore serbe kryen një nga masakrat më të rënda mbi popullatën civile shqiptare.
Në këtë përvjetor kujtojmë 98 martirët e kësaj masakre të cilët u vranë mizorisht vetëm pse ishin shqiptarë.
Dy dekada pas kryerjes së këtyre krimeve makabre, kryerësit e këtyre krimeve ende nuk kanë marrë ndëshkimin nga ana e institucioneve të drejtësisë.
Qeveria e Kosovës dhe Delegacioni Shtetëror për Bisedime nuk do të lënë gurë pa lëvizur derisa të gjenden kryerësit e këtyre krimeve dhe ta marrin dënimin e merituar.
Lavdi e përjetshme të gjithë dëshmorëve dhe martirëve të kombit!
