Eliminimi që në raundin e parë të Champions League nuk i ka dhënë fund aventurës europiane të Egnatias. Kampionët në fuqi të Shqipërisë do ta vijojnë rrugëtimin në kompeticionin e tretë për nga rëndësia i UEFA-s, në Conference League.
Në këtë mënyrë, rrogozhinasit do të jenë pjesë e turit të dytë të këtij turneu, duke shtuar shanset që të jenë më gjatë në kompeticionet europiane. Humbja në transfertën ndaj Brejdablik duhet të kapërdihet shumë shpejt nga ana e skuadrës së teknikut, Edlir Tetova.
Disfata islandeze besohet të ketë sheshuar pikëpyetjet për skemat që duhen aplikuar në fushën e lojës.
Përballja e radhës do të jetë tepër e afërt për Egnatian, pasi javën e ardhshme, konkretisht më 24 korrik, do të zbresin sërish në fushë për turin e dytë kualifikues të Conference League.
Njëra midis Ludogorets ose Dinamo Minsk do të jetë kundër rrogozhinasve, me derbin bullgaro-bjellorus që pritet të dhurojë një kundërshtar të fortë për raundin e radhës për kampionët e Shqipërisë.
Ndeshja e parë e zhvilluar në Bullgari është mbyllur me shifrat 1-0 për Ludogorets, që do të përpiqet të ruajë avantazhin në ndeshjen e dytë, e cila luhet në Hungari, meqë ekipet bjelloruse luajnë në fushë asnjanëse për shkak të luftës në Ukrainë. Ndeshja e parë do të luhet më 24 korrik, ndërsa takimi i kthimit do të zhvillohet më 31 korrik.
