E fundit: Bideni përmbys rezultatin në Georgia, kalon në epërsi dhe i afrohet tepër fitores

Sipas përditësimit më të ri të numërimit të rezultateve në zgjedhjet presidenciale në ShBA, demokrati Joe Biden e ka përmbysur epërsinë e Trumpit në Georgia dhe tashmë ka kaluar vetë në epërsi.

Në bazë të të dhënave të televizionit Fox News, Joe Biden në Georgia tash ka 2.449.371 vota, ndërsa rivali i tij, Donald Trump, ka 2.448.454 apo 917 vota më pak.

Rezultati aktual në Georgia (Burimi: Fox News)

Ky është një ndryshim drastik i rrjedhës së garës së ngushtë, për shkak se tashmë në Georgia janë numëruar 99 për qind e votave dhe rikthimi i mundshëm i epërsisë së Trumpit është matematikisht pak i mundshëm, shkruan Gazeta Express.

Duhet theksuar se Georgia ka 16 vota në Kolegjin Zgjedhor dhe fitorja eventuale e Bidenit në këtë shtet do t’ia siguronte Bidenit fitoren në zgjedhje, të cilën edhe ashtu e ka afër, bazuar edhe në epërsinë momentale që e ka në Nevada.