Në Komunën e Istogut është shënuar një incident teknik si pasojë e një rrjedhjeje të klorit nga një gyp i dëmtuar. Autoritetet komunale kanë reaguar me shpejtësi dhe njoftojnë se situata është tashmë plotësisht nën kontroll dhe nuk paraqet rrezik për qytetarët.
Sipas njoftimit zyrtar nga Komuna e Istogut, defekti është identifikuar dhe riparuar menjëherë nga ekipet kompetente. Uji i pijshëm nga burimi i Istogut është i pastër dhe i sigurt për konsum, ndërsa furnizimi me ujë po vazhdon normalisht.
“Në vendngjarje ka qëndruar edhe drejtori i Emergjencave, z. Xhevat Demaj, i cili ka mbikëqyrur nga afër menaxhimin e situatës dhe ka konfirmuar se nuk ka rrezik për shëndetin publik”, thuhet në njoftim.
Komuna e Istogut, në bashkëpunim me institucionet përgjegjëse, do të vazhdojë monitorimin e rregullt të cilësisë së ujit, për të siguruar standardet më të larta të sigurisë për qytetarët./IndeksOnline/
