Rikthim në ekip i lojtarëve që kanë qenë dikur pjesë e kuqezinjve, si Jahmir Hyka dhe Azdren Llullaku, por edhe hapësira për të rinjtë, janë dy nga strategjitë të cilat po përdor Gianni De Biasi.
Pas Liridon Latifit dhe Eros Grezdës që patën fatin të ishin në grumbullimin e shkuar, këtë herë është Endri Çekiçi që pritet të jetë në listën e De Biasit për përballjen me Izraelin.
Mesfushori i Lokomotivës së Zagrebit pritet që të jetë një prej emrave të rinj që do të shtohen në përfaqësuesen e madhe. Me anë të një postimi në rrjetet sociale, futbollisti ka njoftuar rikthimin si kuqezi.
Nisur nga fakti se i radhës është grumbullimi i Kombëtares A, atëherë Endri Çekiçi ka njoftuar për ftesën e italianit. 19-vjeçari nga Pogradeci ka kaluar nga të gjithë ekipet kuqezi të moshave, U-17, U-19 dhe U-21 dhe tashmë pritet që të katapultohet në Kombëtaren A.
