Prej fillimit të shtatorit Qeveria e Kosovës nuk ka ndërmarrë ndonjë veprim për ta adresuar çështjen e Demarkacionit me Malin e Zi, ndonëse zgjidhja e kësaj çështjeje përbën një nga dy kushtet e fundit që Bashkimi Evropian ka vënë për liberalizim të vizave.
Kjo temë tashmë është hequr nga lista e prioriteteve të ekzekutivit, shkruan sot “Koha ditore”.
Një javë pasi subjektet në pushtet kishin dështuar të siguronin vota në Kuvend, për ta kaluar Ligjin për ratifikimin e Marrëveshjes së kufirit me fqinjin perëndimor, kryeministri Isa Mustafa pati nisur konsultat plotësuese në lidhje me Demarkacionin.
Ai pati paralajmëruar iniciativën për takim edhe me liderët e subjekteve kryesore politike. Po ashtu, për riprocedimin e Marrëveshjes në Kuvend kishte thënë se do ta bënte tek pasi t’i hiqte dilemat rreth kontestit të ngritur për vijën kufitare.
