Ambasadori i Rusisë në Serbi, Aleksandar Çepurin, ka deklaruar sot në veri të Mitrovicës se respektimi i Rezolutës 1244 të KS të KB-së është bazë për zgjidhjen e problemit të Kosovës.
Ai, pas tri ditë qëndrimi në Kosovë, i ka thënë Radio Kontakt Plusit se është “me rëndësi mbajtja e dialogut dhe respekti reciprok”, transmeton Koha.net.
Çepurin ka theksuar se për serbët e Kosovës është e rëndësishme dispozita e Marrëveshjes së Brukselit Për Asociacionin e Komunave serbe, për të cilin, siç ka thënë, “ka marrëveshje por që nuk po realizohet”.
“Pala kosovare duhet të angazhohet që Marrëveshja të realizohet në mënyrë që popullata serbe në Kosovë të jetë e mbrojtur”, ka thënë ai.
Ambasadori ka vënë kurora në “Engjëllin e Bardhë” dhe te përmendorja e konsullit rus Grigori Stepanoviq Shçerbin, i vrarë nga shqiptarët në Mitrovicë, gjatë luftërave ballkanike.
