Me bllokadën amerikane të porteve iraniane tashmë në zbatim, pasi bisedimet e fundjavës dështuan të arrijnë një marrëveshje paqeje, zëvendëspresidenti JD Vance thotë se “topi është në fushën e Iranit” dhe se Teherani duhet të tregojë fleksibilitet ndaj kërkesave të Uashingtonit
Vance ka akuzuar Iranin për “terrorizëm ekonomik” për shkak të bllokimit të Ngushticës së Hormuzit në një intervistë për “Fox News”.
“Siç tregoi Presidenti i Shteteve të Bashkuara, edhe ne mund të veprojmë njësoj,” tha ai. “Nëse iranianët do të përpiqen të angazhohen në terrorizëm ekonomik, ne do të zbatojmë parimin e thjeshtë se asnjë anije iraniane nuk do të dalë jashtë”, u shpreh ai.
“The New York Times” raporton se Irani ka propozuar pezullimin e aktivitetit të tij bërthamor për deri në pesë vjet, një ofertë që u refuzua nga SHBA, e cila këmbënguli për 20 vjet.
Sekretari amerikan i Shtetit, Marco Rubio, do të marrë pjesë në takimin e së martës mes ambasadorëve të Libanit dhe Izraelit në Uashington për të diskutuar konfliktin në Libanin jugor.
Ushtria izraelite thotë se një nga ushtarët e saj u vra gjatë luftimeve në Libanin jugor, ndërsa tre të tjerë u plagosën. Çmimet e naftës ranë në tregtinë e hershme aziatike, pasi shpresat për bisedime të mëtejshme paqeje mes SHBA-së dhe Iranit zbutën shqetësimet për përshkallëzimin e luftës.
Një sondazh i ri nga Universiteti Hebraik i Jeruzalemit tregon një lodhje nga lufta në mesin e izraelitëve.
