Erblin Osmani, 16 vjeç, bëri debutimin e tij të madh në Bundesliga gjatë ndeshjes së së shtunës në shtëpi kundër Union Berlin. Ai u fut në fushë në minutën e 87-të në vend të Leon Goretzka, duke u bërë kështu lojtari i tretë më i ri në historinë e klubit që debuton në ekipin e parë, me vetëm 16 vjet, 10 muaj dhe 2 ditë.
Vetëm Paul Wanner (16 vjet e 15 ditë) dhe Filip Pavic (16 vjet, 1 muaj e 27 ditë) kishin debutuar më herët në moshë më të re. Mosha e Osmanit tregon qartë se ai shihet si një nga talentet më premtuese të Akademisë së Bayern Munich.
Megjithatë, Osmani nuk është i panjohur për publikun e Kosovës. Prindërit e tij janë nga Kosova, dhe mediave kosovare i ka tërhequr vëmendjen që herët, madje edhe para debutimit të tij profesional. Në Gjermani, megjithatë, ai ishte relativisht i panjohur deri këtë fundjavë. Ekspertët e futbollit të të rinjve e krahasojnë Osmanin me Angelo Stiller, për shkak të lojës së tij të zgjuar, strategjike dhe teknike në mesfushë.
Një tjetër lidhje midis tyre është origjina futbollistike: të dy u formuan fillimisht te TSV Milbertshofen në München para se të bashkoheshin me Akademinë e Bayern Munich. Nga i njëjti klub ka dalë edhe David Santos Daiber, i cili këtë sezon ka luajtur dy ndeshje me ekipin e parë.
Osmani u bashkua me Bayern Munich në vitin 2017, vetëm tetë vjeç, dhe që atëherë ka pasur një zhvillim të shpejtë në Akademi. Ai është aktualisht kapiten i U17 dhe ka luajtur dy herë edhe për ekipin U19. Që nga fundi i shkurtit, ai merr pjesë rregullisht në stërvitjet e ekipit të parë, ku ka lënë mbresa të mira, gjë që i dha mundësinë për debutimin në Bundesliga.
