Ishte viti 2011 kur Agim Çeku kishte nisur një mision special. Dëshironte të takonte zyrtarë të lartë të administratës amerikane.
Një kompani lobimi, Prime Policy Group, ishte angazhuar për ta ndihmuar Çekun në përmbushjen e këtij misioni.Në raportin që ia ka dorëzuar Departamentit Amerikan të Drejtësisë, kompania ka treguar detajet e kësaj nisme të Çekut.
Ka treguar se ka dërguar e-maile tek disa njerëz me ndikim për të aranzhuar takime të nivelit të lartë për interes të kryetarit të Partisë Social Demokrate, Gjeneralit Agim Çeku. Në fund ka shënuar se nuk ka arritur që t’ia realizonte këtë dëshirë gjeneralit kosovar.
Në kohën kur është bërë ky lobim, gjashtëmujori i parë i vitit 2011, politika ishte e fokusuar në krijimin e koalicionit qeverisës, pas përfundimit së zgjedhjeve parlamentare të vitit 2010.
Më pas kishte arritur të futej edhe në koalicionin qeverisës, të udhëhequr nga PDK-ja e Hashim Thaçit. Çeku kishte marrë postin e ministrit për Forcën e Sigurisë së Kosovës.
Agim Çeku, tash deputet i PDK-së, i kontaktuar nga Insajderi, ka mohuar të ketë angazhuar ndonjëherë kompani lobuese për ta ndihmuar që të takohej me zyrtarë të qeverisë amerikane.
Detajet e raportit të kompanisë amerikane
Kur kompania amerikane, Prime Policy Group, raportoi në Departamentin Amerikan të Drejtësisë për aktivitetet e saj gjatë gjashtëmujorit të parë të vitit 2011, përmendi edhe emrin e Agim Çekut, tash deputet i PDK-së. Atëkohë ishte kryetar i Partisë Social Demokrate të Kosovës.
Kompania raportoi se kishte marrë për obligim që të ndihmonte Çekun në realizimin e një vizite në Shtetet e Bashkuara të Amerikës. Detyrë e kompanisë ishte që të asistonte Çekun duke i caktuar termine të takimeve me zyrtarë të lartë të administratës amerikane.
“Por, vizita nuk u realizua”, shënohet në raportin e kësaj kompanie. Në këtë raport, kompania amerikane nuk deklaroi se për çfarë shume parash është pajtuar që të paguajë klienti Çeku, në rast të realizimit të vizitës. Raporti i kompanisë nuk jep detaje as për arsyen e dështimit të vizitës së Çekut në Shtetet e Bashkuara të Amerikës.
Megjithatë, në raportet e dorëzuara në Departamentin Amerikan të Shtetit, kompania tregoi për përpjekjet që ka bërë për të realizuar kërkesën e klientit të saj.
Kompania ka shënuar se më 12 janar të vitit 2011 ka dërguar dy e-maile tek Ariel Cohen, drejtues i “Heritage Foundation”.
Lexo edheDështon Projektligji për Arsimin e Lartë, përplasen pozita e opozita
E kishte pyetur atë lidhur me mundësinë e realizimit të takimeve për interes të kryetarit të PSD-së, Agim Çekun. Nëpërmjet e-mailit i kishte treguar se Çeku është duke planifikuar një vizitë në ShBA. Në të njëjtën ditë, kompania i shkroi e-mail edhe Janusz Bugajskit nga “Center for Strategic and International Studies”. E pyeti atë për mundësinë e realizimit të takimeve të Çekut në ShBA.
Një ditë më vonë, më 13 janar, zyrtarët e kompanisë lobuese dërguan tri e-maile tek Ann Stecker dhe Matt Rojansky që drejtojnë organizatën “Carnegie Endowment for International Peace”. Të dyve iu bë e njëjta kërkesë, u pyetën për mundësinë e realizimit të takimeve të Çekut.
Po ashtu, kompania raportoi se Ann Stecker e njëjta kërkesë iu bë edhe më 24 janar të vitit 2011.
Agim Çeku: Nuk kam dëgjuar asnjëherë për emrin e kësaj kompanie
Ndonëse ekzistojnë dokumentet, Agim Çeku, i kontaktuar nga Insajderi, ka mohuar se ka biseduar ndonjëherë me kompani lobuese amerikane.
“Nuk kam ide se si emri im lidhet me këtë kompani, për të cilën kurrë nuk kam dëgjuar”, ka deklaruar Çeku.
Ai ka shtuar se në ShBA ka zhvilluar shpesh takime zyrtare, pa ndihmën e lobuesëve.
“Shumë herë e kam vizituar Amerikën, por çdo herë përmes Ambasadës Amerikane”, ka thënë Çeku për Insajderin.
Derisa fillimisht ka thënë të mos ketë dëgjuar për emrin e kësaj kompanie, Çeku nuk ka komentuar më kur i janë dërguar nëpërmjet e-mailit raportimet e kompanisë amerikane, në të cilat përmendet emri i tij./Insajderi.com
