Pas një paraqitjeje luftarake në “Estadio Coliseum”, Barcelona iu afrua edhe më shumë titullit në La Liga me një fitore 2-0 ndaj Getafes, që kishte fituar shtatë nga dhjetë ndeshjet e fundit.
Robert Lewandowski pati rastin e parë, por goditja e tij me kokë kaloi pak mbi traversë, ndërsa Barça përpiqej të çante mbrojtjen e dendur me pesë lojtarë të Getafes.
Dani Olmo nuk arriti të shërbente si duhet për polakun në një tjetër aksion të rrezikshëm, ndërsa vendasit u përgjigjën me një lojë fizike, ku Mauro Arambarri iu afrua golit në disa raste.
Joao Cancelo ishte shumë aktiv në krahun e djathtë dhe krijoi një mundësi për Olmon, por pa sukses.
Në fundin e pjesës së parë, Roony Bardghji provoi me një goditje të fortë, ndërsa Getafe pati edhe një kundërsulm të rrezikshëm që nuk u konkretizua nga Davinchi.
Në kohën shtesë të pjesës së parë, Fermin Lopez shënoi për 1-0, duke i dhënë avantazhin katalanasve.
Në pjesën e dytë, Getafe u shfaq më agresiv, por Barcelona vazhdoi të krijojë raste.
Olmo ishte pranë golit, por David Soria reagoi mirë, ndërsa tentativa me kokë e Jules Kounde kaloi pranë shtyllës.
Me pak më shumë se 20 minuta nga fundi, vendasit kishin vetëm 20% posedim, dhe kjo u ndëshkua kur Marcus Rashford shfrytëzoi hapësirat dhe shënoi për 2-0, duke vulosur fitoren e Barcelonës.
Ky sukses i çon katalanasit 11 pikë përpara në krye të tabelës me pesë ndeshje të mbetura, dhe ata mund të sigurojnë titullin nëse fitojnë ndaj Osasunas dhe Real Madridit në dy ndeshjet e ardhshme.
Barcelona momentalisht i ka 85 pikë, kundrejt 74 sosh të Realit në vendin e dytë.
Ndërkohë, Getafe rrezikon të dalë nga zonat europiane nëse rezultatet e tjera nuk shkojnë në favor të tyre./GazetaExpress/
