Profesori universitar, Hasan Mujaj, i cili para dy javësh ishte prezantuar si aderim në AAK, sot ka aderuar në PDK!
Më 21 gusht, Mujaj bashkë me disa të tjerë, ishin prezantuar si aderime nga anëtari i Kryesisë së AAK-së dhe kryetari i degës së kësaj partie në Pejë, Ali Berisha.
Por, sot kryetari i PDK-së, Kadri Veseli, e ka prezantuar profesorin Mujaj si aderim në partinë e tij.
Hasan Mujaj ka mohuar të ketë aderuar në AAK paraprakisht, duke thënë se fotoja e publikuar nga Ali Berisha është bërë pa lejen e tij.
“Jo, asnjëherë nuk kam qenë anëtar i AAK-së e asnjë partie tjetër. E kam parë edhe unë fotografinë. Nuk kam aderuar në Aleancë, vetëm kemi biseduar. Zotëri Berisha e ka publikuar atë pa pëlqimin tim”, ka thënë Mujaj.
Më pas ai ka pohuar se i është bashkuar PDK-së, pasi, siç është shprehur, e mbështetë “programin e kësaj partie për zhvillimin ekonomik dhe mënjanimin e dukurive negative”.
KTV-ja ka provuar të marrë një qëndrim lidhur me këtë edhe nga Ali Berisha, por i njëjti nuk është lajmëruar në telefon.
